HANDLINGSPLAN MOT MOBBING FOR

EKERHOVD SKULE

I.   Prinsippa for planen:

1.      Substans:

a)      Det bærande prinsippet er førebyggjing.

b)      Avdekking av mobbing.

c)      Problemløysing når mobbing er oppdaga.

2.    Kontinuitet:

Planen  må sikre kontinuitet.  Han sikrar rutinar og reglar som vi må følgje opp.  Reglane kan bli endra etter behov.   Ekerhovd skule grip fatt i handlingsplanen kvart år. Den vert drøfta i kollegiet, FAU og med elevane. Det vert iverksett ei kartlegging av mobbing på skulen. Dei avtalte tiltaka vert iverksette for mobbar og offer.  Oktober månad er ei høveleg tid for dette arbeidet.

3.    Ansvar:

 Ansvarsforholda er tydelege: Kva gjer klassestyrar, rektor og foreldra.

MÅL:   

ALLE ELEVAR SKAL HA EIT TRYGT OG GODT KLASSE- OG SKULEMILJØ UTAN MOBBING.

II. Kva er mobbing?        (Kilde: Olweus)

Med mobbing eller plaging forstår vi fysisk og/eller psykisk vald retta mot eit offer, utført av enkeltpersonar eller grupper.

Erting er ikkje alltid det same som mobbing.

Mobbing forutset eit ujamt styrkeforhold mellom offer og plagar. Nemninga mobbing vert nytta når handlingane går over tid!

Mobbing er negativ handling over tid.

- Åtferd som har til hensikt å påføre en annen person skade eller ubehag.

- Kan utførast : fysisk

                       med ord

                       grimasar, gestar

                       utestenging

Direkte mobbing: med forholdsvis opne angrep på offeret. Ofte eit fenomen blant gutane.

Døme på kjenneteikn mobbar:

·         Har sterk trong til å dominere og undertrykkje andre elevar, til å hevde seg med makt og truslar og til å få viljen sin.

·         Er hissige, blir fort sinte, er impulsive og har lav frustrasjonsterskel; dei har vanskeleg for å underordne seg reglar og å tolerere hindringar og utsetjingar.

·         Kan vere fysisk sterkare enn klassekameratane, særleg ofra; er fysisk flinke i leikeaktivitetar, sport og slåssing (gjeld spesielt gutar).

·         Dei typiske mobbarane vil for eksempel: Erte (forholdsvis ofte) på ein ekkel måte, håne, bruke skjellsord mot, herse med, true, gjere narr av, latterleggjere, skubbe, sparke, slå og øydeleggje tinga til andre (gjerne fysisk og/eller psykisk svakare) elevar. Jenter som mobbar bruker vanlegvis mindre synlege, og meir utspekulerte, indirekte metodar.

Døme på kjenneteikn offer:

·         Er forsiktige, kjenslevare, stille, tilbakehaldne, kanskje passive, underdanige og sky.

·         Tek lett til tårene.

·         Er redde, usikre og ulukkelege, har eit negativt bilete av seg sjølv; på ein måte signaliserer dei til andre at dei er verdilause og mislukka personar som ikkje vil ta igjen dersom dei blir angripne eller forulempa. Dei er med andre ord ”lette mål”.

·         Kan vere fysisk svakare enn sine jamnaldrande (gjeld særleg gutar).

·         Kan ha ”kroppsangst”: Er redde for å verte skada eller slå seg, er klossete i leikeaktivitetar, sport og slåssing; har dårleg kroppskontroll (gjeld særleg gutar).

III.    Førebyggjing:

Forslag til tiltak på…

…skulenivå:

·         Ein må sikre gode samarbeidstilhøve ved skulen. Då oppnår ein  semje i kollegiet slik at  vi kan opptre konsekvent og  samstemt overfor elevane. Godt samarbeid fører også til fagleg utvikling  i kollegiet.

·         Skulen sikrar gode rutinar for samarbeid med foreldra.

·         Ein må ha klåre og eintydige reglar for skulen.

·         Skulen må ha konkret tiltaksliste for kva ein gjer når mobbing vert avdekka.

·         Skulen må ha gode og tilrettelagde friområde for elevane. Naturen som læringsarena.

·         Skulen må ha gode vaktordningar i friminutta.

·         Fadderordning er ein mogleg veg å gå for å gje dei eldre elevane ansvar og for å sveise dei ulike aldersstega betre saman.

·         Skuleavis/bygdeavis med aktive barn og vaksne.

·         Klubbkveldar, fellesturar, aktivitetsdagar og fellessamlingar.

…klassenivå:

Ein sikrar gode og eintydige rutiner og reglar i klassen. På den måten ungår ein utprøving og tøying av grenser. Reglane er så klåre at dei fungerer jamvel om det kjem vikarar inn i klassen.

Døme på reglar mot mobbing :          1.  Vi skal ikkje mobbe andre.

                                                           2.  Vi skal prøve å hjelpe andre som blir mobba.

                                                           3.  Vi skal vere saman med elevar som går åleine.

(Elevane må få eigartilhøve til desse reglane ved at dei er med på å utforme dei. )

I tillegg til samværsreglane for skulen: eigne ordensreglar/samværsreglar for klassen.

·         Elevane føler seg trygge med klåre grenser for åtferd i klassen.

·         Skape samhald i klassen. Elevane vert sveisa saman i ein veneflokk. T.d. med ein kosetime i ny og ne, gjerne ein gong i månaden.

·         Loggbok. Elevane set ord på korleis dei har det på skulen. Lærar svarer med ein kort kommentar.

·         Elevsamtale. Lærar og elev samtaler om små og store ting. Minst ei samtale per semester. Eleven får gjerne eit ark med tema for samtalen nokre dagar i førevegen. Dermed kan eleven førebu seg i lag med foreldra.

·         Variert undervisning der eleven får oppdage nye sider hos seg sjølv: Prosjekt, undervisning på tvers av alderstega, data som arbeidsverktøy, video, naturen som klasserom med meir.

·         Elevane må få lære å stå framfor klassen for å framføre dikt, skodespel, forteljing, song, rim og regler (betring av sjølvtillit/sjølvbilete).

·         Nokre elevar manglar sosial trening. Viktig å lære dei korrekt framferd slik at dei ikkje skil              seg negativt ut.  (T.d. ”step-by-step”-metoden.)

·         Vennskapsliste.

Døme på ansvarsoppgåver for elevane:

-          Dei eldre elevane kan hjelpe til i undervisninga hos dei yngste. (høgtlesing, leik  o.l.).

-          Henting av post og avis.

-          Plassering av mjølk i kjøleskåpet.

-          Ryddeoppdrag.

Avdekking av mobbing.

I oktober månad kvart år tek skulen opp problematikken rundt mobbing:

-          Mobbing  vert drøfta i personalet og i klassane.

-          Drøfte mobbeproblematikken med klassekontaktane eller i klasseforeldremøte.

-          Spørjeskjema for heile skulen.

Årvakne elevar og lærarar følgjer godt med heile året. Foreldra er obs på fenomenet.

Foreldreansvar

Foreldra  har godt  høve til å følgje opp korleis det går på skulen,

Dei kan leite etter teikn og signal hos eleven på at noko er galt fatt.

Ved å vise interesse for veneflokken til barnet, kan foreldra raskt fange opp signal om utestengjing og liknande.

Foreldra kan gi tilbod om klubbkveldar, kosekveldar for klassekameratane til eigne barn (heile klassen eller mindre grupper). Her kan barn som elles ikkje er så mykje i lag ha det kjekt saman. Diverse spel som ludo, monopol og kortleikar gjev ofte meir sosial samhandling enn reine videokveldar.

Turar i skog og mark er og velkomne. Ein slik kosekveld kan gjerne gå på omgang hos foreldra.

Foreldra støttar opp om ulike aktivitetar på skulen. Det er særs verdfullt å knytte nære band heim - skule.

Det er ope for foreldre å besøke skulen.

Foreldra har ofte ressursar som er til nytte i undervisninga.

Foreldre passar på å ikkje snakke negativt om andre.

IV. Problemløysing når mobbing er oppdaga:

Klassestyrar sitt ansvar (samtale med skriftleg avtale):

-   Samtale med mobbeofferet.

-   Samtale med plagarane kvar for seg.

-   Samtale med plagarane samla.                              

(Sjå: Mobbing i skolen, E. Roland og Vaaland s.34)

1.        I samtalane kjem lærar og elevar med konkrete forslag til problemløysing. Det er viktig at mobbar er aktiv i denne prosessen. Framlegga vert skrivne ned og er forpliktande for mobbar.

2.       I prøvetida har  lærar nye samtalar med offer og mobbar for å sjekke  korleis det går.

3.       NB! Det er viktig å ta seg  god tid  med offeret som ofte slit med skuldkjensle pga. lågt sjølvbilete.

4.       Lærar må og ta på  seg arbeidet med å verne om offer.

5.       Kontakte foreldra til dei som er innblanda. Bruke dei som medspelarar i kampen mot mobbing.

6.       Underrette rektor om konflikten.

NB! Dersom problema ikkje vert løyst gjennom avtale som over, må det verte sterkare reaksjonar overfor dei som plagar.  Desse reaksjonane vert gradvis trappa opp.

Konsekvensar for mobbar dersom avtale over ikkje når fram:

Opptrappingsplan:     

1.        Alvorleg personleg samtale med mobbar. Rektor er og til stades.

2.       Skulen kontaktar foreldra til plagaren.

3.       Alle tilsette på skulen vert orienterte om kva plagaren gjer.

4.       Åtferda til plagaren vert diskutert i klassen.

5.       Plagaren møter foreldra til offeret saman med læraren.

6.       Stormøte mellom plagar, eigne foreldre og foreldra til offeret .

7.       Eleven sit utanfor rektor sitt kontor i visse friminutt.

8.       Eleven kan sitje ein eller fleire timar i annan klasse.

9.       Eleven må halde seg saman med den lærar som har inspeksjon i friminutta.

10.    Eleven får ikkje ta skulebuss i ein periode når det er snakk om plaging på skuleveg. (Uklårt ansvar skule/foreldre/busselskap.)

Vedlegg:       Spørjeskjema

Spørjeskjema til elevane om MOBBING:

Du skal ikkje skrive namnet ditt på skjemaet, ingen skal vite kven som svarer.

Elevar i 3.-7. klasse kan svare på eiga hand. Elevar i 1.-2. klasse får hjelp av klassestyrar.

1.              Gut         Jente          (set kryss)

2.     Kva klasse går du i?    ________

3.     Kor ofte har du blitt plaga/mobba på skulen dette skuleåret?   (set kryss)

       Aldri            av og til                 kvar veke               kvar dag

4.      Kor på skulen er det plaginga/mobbinga skjer?

5.     Når på dagen skjer plaginga/mobbinga?     (set kryss)

  om morgonen   i friminutta    i timen            i sfo            til/frå skulen    i fritida

6.     Kor ofte har du blitt plaga/mobba på skulevegen dette skuleåret?    (set kryss)

        aldri            av og til        kvar veke        kvar dag

7.     Korleis vert du plaga eller mobba?

    stygge ord       kallenamn      slag/spark    utestenging      trussel       andre måtar

                                                                                                                          (beskriv)

8.     Kor ofte har du plaga/mobba andre elevar på skulen dette skuleåret?   (set kryss)

              aldri            av og til        kvar veke        kvar dag

9.     Kor ofte har du plaga/mobba andre elevar på skulevegen dette skuleåret? (set kryss)

               aldri           av og til        kvar veke        kvar dag

10.  Kva gjer du dersom du plagar eller mobbar andre?

    stygge ord       kallenamn      slag/spark    utestenging      trussel       andre måtar

                                                                                                                          (beskriv)