Desember 2007

Gode bygdefolk.

Ny Grendapost betyr igjen litt nytt frå Ekerhovd oppveksttunet. I skule og barnehage har vi denne hausten totalt 25 tilsette og 132 barn med stort og smått. Satsingsområda våre i skulen er Praksisnær undervisning, Sosial kompetanse og It’s learning.  I barnehagen arbeider vi vidare med Pedagogisk utviklingsarbeid (MI etc.) og Estetisk opprusting.

Litt om nokre av satsingsområda:

Som ein del av utdanningsdepartementet si satsing på digital kompetanse i skuleverket, har skulane i Fjell, Sund og Øygarden etablert digitalt klasserom for alle elevar, lærarar og føresette.

Til dette vert læringsplattforma It’s learning brukt. Dei fleste klassane på vår skule er aktivt i gang med It’s learning og alle skal vere i gang i løpet av året. Vi vil også få montert interaktive/digitale tavler i alle klasserom. Dette vil vere på plass rett på nyåret. For dei som vite meir om desse tavlene sjå www.trimax.no.

For å hjelpe oss med praksisnær undervisning og realfagsatsing, får vi i år besøk nokre gonger av fagleg mentor frå NLA. Ho skal mellom anna følgje opp lærarane i arbeid med uteskule og det å ta i bruk nærområdet vårt i undervisninga. I den samanhengen vil eg også nemne det nye uteklasserommet vårt nede i parken. Her har vi ved hjelp av kvalitetsbetringsmidlar frå kommunen og flott dugnadsinnsats frå foreldre fått bygt eit såkalla multihus som samlingsstad når vi har uteskule.

Leksehjelp

Elles har vi sett i gang eit tilbod om leksehjelp til elevar rett etter skuletid. Elevar kan vere att i klasserommet sitt etter siste time og få litt hjelp til lekser av vaksne på skulen. Dette gjeld førebels dei største som går på sfo og elles elevar på mellomsteget. Det er her viktig at heimane likevel ser over alle lekser når eleven kjem heim.

Til slutt

Til slutt vil eg ønskje heile bygda ei fredeleg julehøgtid og eit godt nytt år! Elevar og barnehagebarn er hjarteleg velkomne tilbake til oppstart på nyåret onsdag 3. januar.  

Med helsing

Willy